‘azeri şairleri’ Yazı Arşivi

Onsuz da qaradır üzüm yanında,
Ağlım hisslərimin əsiri olub.
Bilirəm, taleyin imtahanında,
Ömür qiymətimin kəsiri olub.

Sən məni aşkarda görmək istədin,
Mən sənə yuxuda pənah gətirdim.
Sən mənə qəlbini vermək istədin,
Mən sənə bir yığın günah gətirdim.

Günahım arxamca yeriməsəydi,
Bəlkə öz kölgəmdə yata bilərdim.
Ümid qanadlarım əriməsəydi,
Uçub günəşə də çata bilərdim.

Varlığım, yoxluğum düşüb gözümdən,
Nə qədər istəsən əzab ver mənə.
Mən niyə küsmüşəm özüm-özümdən?
Bəlkə sən bilirsən, cavab ver mənə!

Sözümü eşidib qulaq assaydın,
Özümü ən xoşbəxt adam sayardım.
Mənə günahımı bağışlasaydın,
Mən sənə dünyanı bağışlayardım.

Onsuz da qaradır üzüm yanında,
Ağlım hisslərimin əsiri olub.
Bilirəm, taleyin imtəhanında
Ömür qiymətimin kəsiri olub.

Müəllif: Elnarə Şəms

Yoxdur səndən özgə könül sirdaşım,
Soruşa halımı,bilə dərdimi.
Görmədim fələyin sevinc payını,
Mənə hədiyyəsi elə dərdimi?

Ey məni bu qədər tox görən adam,
Doymadım bu dərddən,yox,görən adam.
Mənə sevincimi çöx görən adam,
Nə ola çəkməkdən ölə dərdimi.

Dünya çoxlarına bal dolu pətək,
Ömrüm arıların”sancdığı”çiçək.
Yığdım qucağıma qəmi bir ətək,
Yüklədim boynuma şələ dərdimi.

Elnarə,bu fələk namərddir yaman,
Mərd olan istəməz namərddən aman.
Dərdim ürəyimi böldüyü zaman,
Ola bir həmdəmim,bölə dərdimi.

Müəllif: Elnarə Şəms