Sən yadıma düşəndə

Təmizliyə çxıram

Saqqalımı qırxıram

Paltarım ütü görür,

Saçıma daraq dəyir

Elə darıxıram ki,

Siqaret yandırıram

Dilimə araq dəyir.

Sən yadıma düşəndə

Saatın əqrəbindən

daş asılır elə bil

Sığınıram təkliyə

Zaman dayanır,

axmır

dost,

tanış,

qohum

Küsür üzümə baxmır.

Unuduram özümü

Qopur bədəndən ruhum

Ürək sözümə baxmır.

Sən yadıma düşəndə

Qələmimə sarılıb-

baş əyirəm kağıza.

Alovum ərşə çıxır

Külət uğultu ilə-

Üfürdükcə közümü

Xatirə dəftərimdə-

Səni gəzib tapıram

İtirirəm özümü.

Sən yadıma düşəndə

Burnuma qoxun gəlir

Bahar fəsli doğulub-

payız ölən gül kimi.

Qəfildən yuxum gəlir,

Yatıb səni görürəm

Köhnə fotolentdəki-

Ağ –qara şəkil kimi.

Müəllif: Roma Xosrov

Yorumlara kapalı..